黑社會治港

回歸以來，先由商人治港不成，弄至腳痛下台，公務員治港又最後入獄，專業人士治港攘成暴動，由好打得之人治港，更弄至顛覆國家，一鑊比一鑊勁。現在新嘗試，愛國者治港，記起以前有國家領導人說「黑社會也有愛國的」，既然如此，來屆就起用黑社會掌舵人為特首，好處說不完，香港再次起錨，再出發，不用口號，成功可期。

首先，黑社會一向有班底，組織緊密，分工有序，紀律嚴明，上令下達，一蹴即成，不成功即成仁。反觀多屆政府，找來了特首，先要傷腦筋找司長局長，臨急臨忙，搵到叻人又未必肯制，結果鑑硬搵到多個唔得掂之流，搵齊晒重要驚特首個老頂唔任命。好勒，辛苦揍夠班，正式上任，由於咁多人一齊同一日開工，完全冇晒磨合期，做起嘢上來，乸手唔成勢，兼且事事要靠班公務員，呢班友仔平時歎慣，收人工只係交行貨，唔駛咩飛，又唔駛諗計仔，講到問責更加唔關佢哋事，由其是高級公務員，個個等夠鐘收大水，唔好攪咁多嘢，所以無論司長局長幾咁把砲，郁唔倒呢班友，真係做死自己。如果黑社會治港則唔同，一吹雞，個個自動埋位，職責分明，要乜有乜，要幾多有幾多，效率係而家政府冇得比，呢D完全係事實，冇半點作大。

重有，黑社會出馬，冇時間限制，早午晚任何時間，冇人事調動困難，甚至補唔補水都唔相干，絕對服從，唔駛好似而家咁陽奉陰違，淨係呢D優點，响咁多屆政府冇得揮。大家更加唔駛擔心黑社會嘅人材問題，因為黑社會歷史悠久，耐過共產黨成立嘅中華人民共和國，咁多年涉足所有不同行業，大把專業人士，文又得，武又得，做嘢唔會畏首畏尾，懂法律，更有地下法，有規有矩，連國安法都可以收回，慳番八十億。

OK，待人大决定此法可行可試，祈求一番新氣象，剩下來係如何選，話晒香港仍然一國兩制，依法治港，但要重新安排選舉程序，免得俾班係又反對唔係又反對嘅攪亂秩序，既要公平公正公開，同時又要唔比人知偏頗側埋一面絕密進行，不過大家唔駛擔心，呢樣嘢揸fit人駕輕就熟。由於要避免俾人有口實又係欽點，因此正式選舉前要通知所有大小堂口，俾足時間招兵買馬，以至適當時間曬曬馬，話晒管治七百幾萬人，冇番咁上下實力，唔騷騷quali，好難令人信服。黑社會治港重有一大好處，唔駛專登搵保安司，好多大佬隨時勝任，每個環頭都有一哥，警隊亦都唔駛「筆直」億億聲添裝備，甚至連制服都可以慳埋。差點唔記得講，黑道競選過程必順利，唔駛驚有初選，邊個敢提甚麼三十五加，必遭還以杏加橙。

中國內地奉行社會主義，行之有效，香港當效之，常有道香港官黑合作，互利互惠，互諒互讓，相安無事，反正滿街黑衣人，不妨試行黑社會主義，以符其實，孔子云，名不正則言不順也。

當選者出自黑社會，必然愛社會，即係愛香港，加埋前領導人endorse愛國，一定鎮得住香港，穩定壓倒一切。各位市民請支持，投神聖一票。噫，好似選特首冇我哋份，唔關我哋事喎。