醉眼看新聞 - 鲁比奥，好自為之！

盧比奧，兩度被中國制裁，原則上，被制裁的人不可與他有任何聯繫接觸，一如港官被美制裁，銀行也避三舍。侵侵當選美總統後，委任一條友為國務卿，中國叫他做魯比奧，兩個唔同姓，所以與魯比奧交往無抵觸制裁令，萬一將來魯比奧唔生性，步盧比奧後塵，中國可以再主動換另外一兜友，叫他做撈秘奧[撈粵音第四聲]，看似秘撈，秘而不宣，再做乜都冇問題，所以話中文博大精湛，可以應付不同環境需要。

話說近日魯比奧與中國外長通話，事後中方發表中英文會談內容，兩版本意思有所不同，中文版有痛斥魯比奧「好自為之」，令得我等中華兒女雀躍非常，今時今日，中國人已不單止可以向外國人說不，還可以面斥其非，我等大地兒女簡直吐氣揚眉，一雪百年恥辱。這個魯比奧唔知真唔知定假唔知，居然話冇聽到中外長講「好自為之」幾個字，當然，就算聽到這四個字也唔會知係乜，佢係靠翻譯，我哋又唔知現場翻譯嘅係中方代表還是美方代表，如果簡單直接譯為Behave yourself，鬼子佬會覺得好blunt，不禮貌，有警告意味，相信魯比奧會即時還拖，如果逐個字面翻譯，可能係Goodself do it，不但不冒犯，聽起來還有點恭維，至於佢哋講左D乜嘢，應該屬國家機密，我哋普通人唔會知。

醉眼最後奉勸美帝以後同中國打交道，避免蝕底，先學好中文，學懂普通話，又或叫國語，又可叫漢語，又可以講唐話，所以話中文博大精湛，言語都有多種說法。點解叫漢語，因為古代漢朝強大，所以有立法會議員帶領穿漢服，講唐話因為唐朝國盛，所以有時話着唐裝衫，而西方國家通通穿西裝，無顯甚麼時代是強國，不過某些立法會議員思想不甚正確，穿漢服老是懷勉過去，誰不知現在共產黨領導下的中國歷來最鼎盛，大家應該穿共服，甚麼是共服，看最高領導人閱兵時所穿便是也。