教你寫財經

股市每天每分每秒都在波動，作為評論專家，必定要論述一番，解釋個市點解升，跌時又要講點解跌，一定要言之鑿鑿，言之成理，在下半世紀經驗，今天教大家點樣睇市，我係教大家點樣睇過咗去嘅市，既然過去，結果已知，亦是以結果為目標。

下列不二之門，數十年股評都冇錯，但冇錯不等於啱。

寫預測，記得用‘料’字，如後市料有上有落，料有波動..。上一天外圍高收，則料港股高開，外圍跌則料港股低開。今天嚟講，我都話咗料高開。

股市牛皮，即不上不落，叫整固，有高位整固，有低位整固，視乎股市近來是升還是跌。

股市上升，一於話有資金流入，最容易話係北水。錢銀進出香港，過後先至有數睇，但有錢入不一定是買股票，無論如何，一於入股市條數，反之下跌也是同樣理由。

股市升便是轉強，跌則便轉弱，不二法門。

加多一句，股市升是夾空倉，跌是夾好倉。

叫人買股票，記得定下止蝕位。筆者經驗，多時止蝕後回頭。

不妨加多句，升穿幾多便轉強，跌穿幾多便轉弱。恒指這幾天自萬八水平升上來，一於話股市已轉强。

個市唔知點解跌，除了話有大戶套現，再不然，是由於地緣政治不明朗。有地球歷史以來，這句話幾時都冇錯。

至於股市會去到邊，一於睇住上下幾條平均線嚟講，反正讀者唔會記得，寫嗰個亦都唔會記得。