盛事經濟

由於萬聖節氣氛濃，當局推行萬聖月，一於攪旺個市。以此概念，醉眼贊成節日以月計，如農曆新年定新年月，則成個月日日派利是，市面消費大必增加；情人節為情人月，花店日日狂賣花，香港勢必成鮮花港，圓老董之遺願；清明節為清明月，此月份日日去拜山，令人長時間慎終追遠，不忘本而感謝政府關懷；母親節父親節為母親月和父親月，則成個月日日帶父母上茶樓，解救飲食業；佛誕為佛誕月，宣揚佛法精神，社會更安定忍讓；端午月則日日爬龍船，市民強體健魄，醫療開支大減；盂蘭月可以長時間警惕市民小心有鬼，防止軟對抗；中秋月也如是，成個月迎月賞月追月，晚晚夜繽紛；國慶月增長愛國觀；重陽月使人想起登高避難，可逃意外... 真係講唔晒，月月日日有盛事，名符其實盛事之都，遊客滾滾來，市面想唔旺都難，營商者收錢收到手軟，政府稅收大增，立可滅赤。其它還有洋人的復活節、聖誕節或稱耶誕等，若以政治正確而言，不提也罷，一如維多利亞公園，已有人嚷廢除或改名。又講番轉頭，乜萬聖節唔係鬼佬嘅節咩！佢哋都係玩一晚咋！

推行萬聖月，已在必行，市民可以日夜扮鬼扮馬，多D歡樂，則少D怨氣，就是有人別有用心唱衰特區，使人憎恨政府都一定唔會成功。不過要請局長定紅線，扮鬼扮馬之時，有D乜嘢唔可以扮，譬如只可以扮特朗普，更不可以扮宏福苑，以免唔覺意，及萬一造成意外效果，以節亂港，非咱們所願也。