醉眼看新聞 - 齊齊學阿拉伯語

醉眼是本屆特首fan屎，所以上禮拜三佢發表嘅重要講話，由頭到尾望住部電視機，因為佢聲線好溫柔，令我瞓咗幾覺，雖然如此，對部份內容非常深刻，發現可能無意洩漏天機，其中叫的士司機學阿拉伯語。

點解唔叫人學好全世界仍較普遍嘅英語？可能認為英語地區開始沒落，學嚟都冇用。又點解唔叫人學老撾語或柬埔寨語，特首也曾專程去訪，講到很大商機，此中又有玄機，要識得取捨，所謂識時務者為俊傑。

大家都知道，中東盛產石油，財源滾滾來，所以有些國家連警車也要用法拉利，阿拉伯為最大石油出產國，多年積聚嘅財富，真係多到唔知點用，可能我哋地區嘅最高領導人，早已洞悉先機，暗中拉up咗條水，未來有大量阿拉伯人來港，所以暗示大家準備學好阿拉伯語，一如以前要學好普通話，而的士司機成日在路上通街走，接觸機會自然最多，其實各行各業都要準備歡迎大量阿拉伯，阿拉婆，阿拉仔和阿拉妹，市面再度繁榮，更勝從前，話晒阿拉伯人嘅錢通通見得光，不虞協助洗黑錢，可以名正言順，唔駛經地下錢庄。由於阿拉伯很多地方禁酒，且售賣又有時間限制，所以香港已立即大減烈酒稅，歡迎他們來港大飲特飲。不過呢次唔會同上次咁過份高調，王子來港設立家族辦公室，唱到街知巷聞，嚇到王子唔敢番嚟，唔知恆生大學個名譽教授重有冇保留。

有見及此，阿拉伯語勢將流行，各大的士公司招聘司機，要加入條件，懂阿拉伯語優先。亦須建議學校增加阿拉伯語科目，成三文四語，阿拉伯是歷史大國，文化源遠，很多值得研究學術。地鐵車廂廣播，亦要有阿拉伯語，予貴客方便。阿拉伯將視香港為最友善伙伴，話唔埋將賣石油嘅代理權給予香港，成為亞太區sole agent，將來新加坡都要同香港買先至有得煉油，於是乎，航運重生，兼要發展油輪生意，可考慮啟德郵輪碼頭改為油輪碼頭，好過一年丟空三百幾日。

各位，未來在路上遇見無論阿拉甲，阿拉乙，阿拉丙，都要熱情寬待，萬一好彩碰到阿拉丁，許你願望，發達矣。