醉眼看新聞(一九四) 特稿 - 國家安全法

(疫情之下)

-擁權貴派很喜歡指責民主派挾洋自重。一個地方人民不能向自己政府進諫，而要求助別國政府，悲夫。

-麻雀館對關閉令有强烈抗議，因佢哋較食肆更自律，肯定每檯唔會超過四人，兼且坐定定，唔會周圍走。

-教育局長話中學生會率先復課。點解唔係大學生？記者暗訪下，原來未來大圍捕，大學生全部拉晒。

-林鄭精補漏洞，去年修例補過去二十幾年所有前特首都看不到的漏洞。但此次防疫基金，承認有多方漏洞。

-城市論壇沒有了現場觀眾，少了激烈極端的表述，過程顯得沉悶。

(財經版)

-財經專家：美股已見底，可分段買入。既然已見底，為甚麼還要分段入市？應該立即瞓身落重注，做埋孖展！

特稿 - 國家安全法

前幾天乘地鐵，旁邊一個不大純正廣東話的阿嬋問他的兒子，甚麼是國家安全法，兒子簡單回答，國家安全法就是保障國家安全，阿嬋又問，乜立左法國家就安全？兒子又答，立法是防止有人顛覆國家，阿嬋又繼續問，香港人點樣可以顛覆倒國家？兒子唔識答，對面一個阿伯加入對話，佢話一個國家包括領土，包括人民，國家安全法就係嚟保護國家嘅領土同埋人民，然後阿伯忽然曾鈺成上身咁數左十幾條國家安全法裏面嘅條例，我聽到都好佩服佢咁好記性，點知阿嬋即刻插嘴：「阿叔你唔駛講咁多，等我話俾你聽，保護國家領土和人民安全，不受外來侵略，係靠軍隊，唔係靠立法，你講咁多，立法係用嚟對付自己人民，唔俾人反對領導人，唔好阿之阿jaw，阻住阿爺發達，一係做順民，一係埋堆搵錢，有機會就加入共產黨，齊齊搵快錢移民。」說完起身話到站落車，此時整個車廂拍手掌，不知這些算不算黄絲，何其多也。